(Әлмәт, 18 май, "Татар-информ", "Әлмәт таңнары"). Пицунда шәһәрендә булып узган III «Южная сказка» Халыкара фестиваль-бәйгесендә Әлмәтнең 1 нче лицей-интернатның «Зилант» фольклор ансамбле «Инструменталь иҗат» номинациясендә I дәрәҗә лауреат булып танылды, дип яза җирле басма.
Биредә Россия һәм якын чит илләрнең 17 шәһәреннән килгән 600 гә якын конкурсант чыгыш ясады. Яшьләр хореография, вокал, театраль иҗат, модалар театры, рәсем сәнгате, инструменталь иҗат номинацияләрендә осталыкларын күрсәтте. Шулай ук алар өчен Гагра, Сухуми, Яңа Афон шәһәрләре, Рица күле, Яңа Афон мәгарәләре буенча экскурсияләр дә оештырылды.
