Ришат&Матурова = ?

Татар эстрадасының кимчелекләрен күрсәтеп язучы “Матурова” аккаунты барлыкка килгәч, артистлар күңеленә шом төште. Бик күпләр кайбер җырларның чиста плагиат булуын аңлады. Сәхнәдән матурлык таратырга тиеш дип аңларга күнеккән артистларның бер-берсе турында нинди фикердә булуы, тамашачылары белән ничек аралашуы турында видеохәбәрләр пәйда була башлагач, артистлар беркадәр аңышмый торды хәтта. Кем ул Матурова, бу кадәр мәгълүматны кайдан туплый, максаты нидә? Агымсуга ияреп, тыныч кына “гомер иткән”  шоу-бизнес дөньясы шактый болганды. Ришат Төхфәтуллинның “Матурова”ны  “Уродова” дип атавы инстаграм дөньясын янә “кайнатты”. Физик кимчелеге булганнарга гына атап әйтелүче бу ямьсез сүзне куллану  Атказанып, тамашачы мәхәббәтен яулаган җырчы кешегә килешәме? Ришатның концертларына йөрүче тугры җанатарлары да аның бу гамәленнән бераз шок хәлендә калды кебек. Дөрес, җырчы бу сторизларны бетереп аткан, әллә ялгышын аңлаганмы?

Матурованың теләк-максатлары да билгеләнде кебек, бу хакта “Сәхнә” журналының гыйнвар санында аның белән интервью дөнья күрде. Бәлки Ришатның  шәхесне кимсетеп “Уродова” дип атарлык башка сәбәпләре бардыр? Кемне яклыйсыз? Артистлар хаклымы? Сезнең фикерне ишетик әле...

Фото социаль челтәрләрдән