Сак булыгыз – алдыйлар!

Татарстанның атказанган артисты Данир Сабиров Инстаграмда тамашачыларын кисәтә. Бөтен җирдә алдау, сак булыгыз, – ди юмор остасы.

Үзенең иҗат төркемендә биюче булып эшләгән кызның ничек алданганын сөйли Данир. Вакытлыча торырга фатир эзләгәндә бер белдерүгә тап була ул, хуҗасы белән күрешергә килгәч, фатирны ошатып, 50 мең күләмендә айлык түләү акчасын да биреп җибәрәләр. Фатирда урнашкан арада, шкаф киштәләрендә бер киелә торган аяк киемнәрен күреп алалар. Интернетка әлеге торакның адресын кертеп карасалар, тәүлек саен кеше кертелә торган фатир булып чыккан! Ә айлык 50 мең акча инде юк.

Менә шушындый хәлләрдән сак булырга киңәш итә Данир. Тамашачыларының башка шундый алдау ысуллары белән дә бүлешүләрен сорап мөрәҗәгать итә ул. Җәмгыятькә бу файдага гына булыр, дип белдерә артист.