Тәбрис Яруллин Татар яшьләре форумында күтәреләчәк төп темалар хакында сөйләде

1-5 август көннәрендә Казан шәһәрендә узачак VIII Бөтендөнья татар яшьләре форумында бизнес, гаилә һәм тәрбия, медиа, тел һәм мәгариф, яңа мәдәният темалары күтәреләчәк. Бу хакта Бөтендөнья татар яшьләре форумы уздырган матбугат конференциясендә форум рәисе Тәбрис Яруллинсөйләде.

“Без быелгы форумның төп темасын һәм идеясен "Киләчәк" дип атадык. Чөнки безгә һәрвакыт: “Яшьләр – ул безнең киләчәгебез”, - дип әйтәләр. Киләчәк кая алып барыр, ул нинди була? Бу турыда безгә әйтмиләр, аны без үзебез күзалларга тиеш. Минемчә, бу - бик дөрес фикерләү. Пленар утырыштан кала, программада булган барлык чара да шуңа корылган”, - дип сөйләде Тәбрис Яруллин.

Татар яшьләре форумында дискуссион мәйданчык та булачак.
“Делегатлар белән дискуссион мәйданчыкта бизнес, гаилә һәм тәрбия, медиа, тел һәм мәгариф, яңа мәдәният темаларына сөйләшәчәкбез. Болар - безне борчыган мәсьәләләр. Аларның нәтиҗәләре бер – киләчәкне күзаллау булачак, чөнки без киләчәкне дә кайгыртырга тиеш”, - диде Тәбрис Яруллин.

• VIII Бөтендөнья татар яшьләре форумы эшчәнлегендә 30 чит ил, РФнең 60 регионы һәм Татарстаннан 1000 артык делегат катнашыр. дип көтелә. Форум программасы эчендә эшлекле очрашулар (пленар утырыш, дискуссион мәйданчыклар, проект сессияләрен уздыру), төрледән-төрле мәдәни-мәгълүмати һәм өйрәнү сәяхәтләре, шулай ук Казанның татар тарихы белән бәйле урыннарына бару, Арчада шәһәр көнендә һәм “Печән базары” фестивалендә катнашу күз алдында тотыла.

татар-информ

Фото: Илнар Төхбәтов