Зөлфия Шакированы котлыйбыз!

Бүген Татарстанның халык, Башкортостанның атказанган артисты Зөлфия Шакированың туган көне. Хәләл җефетен котлап, Җәвит Шакиров шигырь язып урнаштырган.

«Син минем өчен Ходай бүләге! Сәламәт, бәхетле булып, тамашачыларны, балаларны, оныкларны сөендереп яшик әле, җаным.

Без икебез – бербөтен!

Кочагыма килеп сарыл син,
Йөрәк кылларыма кагыл син.
Мәхәббәтле тормыш җырымның,
Моңы булып кына агыл син.

Бәхетнең дә була төрлесе,
Алтынның да була көмеше.
Без икебез инде бер бөтен,
Без икебез куптән бер кеше.

Башларыңны салып иңемә,
Тының белән мине иркәлә.
Чәчләреңне җилләр туздырсын,
Бу төш түгел, иркәм, өн булсын.

Бәхетлеме син, дип сорама,
Күзләремә кара – аңларсын.
Күзләр, алар, күңел көзгесе,
Соравыңа җавап табарсың», – дип язган җырчы.