Гөлназ Шәрипҗанова: «...акырта-бакырта чабалар иде»

Ут яндырып кемнәр мунча керергә ярата? Сөреме эчкә кергән зур, кап-кара, эссесе тынга каплана торган мунча? Кечкенә вакытта ләүкәгә сузып салып, яндыра-пешерә арка чабулар... Эх!.. Әнә, җырчы Гөлназ Шәрибҗанова да шул чакларны сагынып, инстаграм битенә мунчага багышланган пост язып элгән әле. Кечкенә чагы – Азнакай районы Карамалы авылында, карт әбисенең мунчасы турында язган җырчы кыз. «Ләүкәдә утырып, янып-пешеп кереңне чыгарасың. Мунчаны кем кертсә дә, алгоритмы шул ук: морҗаның кара тимер ишеген ачып җибәреп, эссе салып, себеркене пешерәсең. Аска – идәнгә төшеп, чәчеңне «Каен» («Березка») шампуне белән юасың. Кер сабыны белән юкә мунчаласын күбекләндереп, башта аркаңны ышкып бирәләр иде, аннан үзең бөтен тәнеңне ышкыйсың. Тагын ләүкәгә менеп, акырта-бакырта чабалар иде» – дип хатирәләр яңарта Гөлназ. Ул акырта-бакырта чабуларга чыдам булган җырчы – чөнки соңыннан, мунча кагыйдәләре буенча, салкынча су белән коендыру каралган иде бит. Шул балачак хатирәләредер инде – Гөлназ хәзер үз балаларын акырта-бакырта чаба икән... Эээх, балачакка – әбекәй-бабакайлы балачак истәлекләрен яңарттың, Гөлназ... Мунчасы аның хәзер дә шул ук мунча инде, әмма кечкенә чактагы кайнарлыгы гына сүрелә төшкән кебек.

Автор: Гөлнара Җәлилова