Җырчы Гүзәлияне ире ничек бәйрәм белән котлаган

Нәрсәләр бүләк иттеләр? Гөлчәчәкме, лаләме, нинди төстәгесен? Халыкара хатын-кызлар көнендә игътибарны үзебез теләгәнчә, туйганчы аласы килә инде ул, име?

Әнә, автор-башкаручы, композитор Гүзәлия дә шулай ди ‒ хатын-кыз наз-хөрмәткә 8 мартта гына түгел, һәр көнне лаек инде ул. Гүзәлия исә бүгенге бәйрәм иртәсен Казанда каршылаган икән. Эше буенча соңгы араларда Казанда булырга туры килгән җырчы бәйрәмгә дип кенә ире янына Мәскәүгә кайтып китмәгән инде. Әмма бәйрәмдә аның игътибарыннан башка да калмаган.

Ире аңа... Сюрприз итеп рестораннан ризык китерттергән. «Күңел күтәрелде инде, ‒ ди җырчы. ‒ Кайгыртучанлык кемнең күңеленә хуш килмәсен ди? Менә, тәмләп ашап утырам әле». Продюсерын җырчы Хәким дә котларга онытмаган икән. Анысы Гүзәлиянең 8 март иртәсен гөлчәчәкләр гөлләмәсе белән  бизәгән.

Автор: Гөлнара Җәлилова