Бөек җырчының тууына 110 ел тулуны каршылап

Инстаграмда Рәшит Ваһапов исемендәге халыкара татар җыры фестиваленең эмблемасы кызыл белән сызып ташланган фото урнаштырылып, күпләрне гаҗәпкә калдырган иде. Әлеге фотолар социаль челтәрләрдә тамашачылар арасында шау-шу куптарды, күбесе канәгатьсезлек белдерде. Кемнәрдер фестивальнең язмышы ничек хәл ителүен вакыт күрсәтер дип фаразлаган иде.

Ул вакытта продюсер үзенең шәхси аккаунтында: «Хәрәкәттә – бәрәкәт, диләрме әле. Бер генә оешма, бер генә проект та катып калган күренеш түгел. Шул исәптән Рәшит Ваһапов фестивале дә һәрдаим эзләнүдә, үсештә. Фестивальнең логотибын алмаштыру – шул үсеш-үзгәрешләрнең гади бер техник өлеше генә. Мөгаен, тагын да яңалыклар, үзгәрешләр булыр әле. Әмма Ваһапов фестиваленең асылы, нигезе алыштыргысыз! Ул – бөек милли мирасыбызны, чын татар җырын, чын татар моңын пропагандалау, талантлы яшьләребезне зур сәхнәгә күтәрү», – дип язды (текст үзгәртелмәде).

Без дә моңа инанабыз, ни дисәң дә, быел фестиваль үзенең 15 еллыгын билгеләп үтә. Талантлы яшьләребезгә юл ачык! Фестиваль турында куанычлы хәбәр җиткерәсебез килә. Татарстан Республикасының Россия Федерациясенең матбугат хезмәте вәкиллеге хәбәр итүенчә, 27 октябрьдә Мәскәүнең Союзлар йорты Колонналы залында Ваһапов фестиваленең гала-концерты узачак. Ул Рәшит Ваһаповның тууына 110 ел тулуга багышлана.

Гала-концертта татар эстрадасы легендаларыннан – Ренат Ибраһимов, Зилә Сөнгатуллина, Зөһрә Сәхәбиева һәм фестивальнең яшь лауреатлары – Илһам Вәлиев, Айгөл Сагынбаева, Раяз Фасыйхов, Гөлназ Асаеева, Рәнис Габбасов, Гөлсирин Абдуллина, Азат Абитов, Айсылу Габдинова, Марат Яруллин, Динә Гарипова һ.б катнашачак.

Автор: Г.Ярмиева

Фото: инстаграм @ r_fattakhov_

Следите за самым важным и интересным в Telegram-каналеТатмедиа