Бөдрә чәчле Фәрһад яки Тинчурин театрында - премьера!

Кәрим Тинчурин исемендәге Татар дәүләт драма һәм комедия театры  1980-1990 нчы еллардагы Казан шәһәренә сәяхәткә чакыра. «Ядәч! Исемдә!» музыкаль трагикомедиясен венгр режиссёры, 20 ел элек үзе дә Казанда яшәп киткән Сәрдәр Таһировский куя. Ул моны спектакль – хатирәләр дип атый. Ул яшәгән чордагы Казанга сәяхәт, янәсе. Төп герой прототибы – Сәрдәр үзе. Бу рольне үзе дә бераз Сәрдәргә охшаган яшь актёр Фәрһад Мөхәммәтҗанов башкара. «Рольләргә актёрлар сайлаганда чәчемне юып кына килгән идем, ә алар бөдрә (Сәрдәрнең үз чәчләре дә дулкын-дулкын). Гадәттә киптереп турайта торган чәчемне рәтләргә вакытым булмады, шул бөдрәләрем белән киттем театрга. Бу  язмышымны хәл иткән көн булды: мине төп рольгә билгеләделәр. Бу  - дебют», - ди Фәрһад. Уңышлар сиңа! Ә Могҗизалар иленә сәяхәтне 2 декабрьдә башлыйбыз!