Чаллыда III Россия милли театрлары фестивале узачак

Атна дәвамында тамашачылар Башкортстан, Ингушетия, Марий Эл Республикасы, Мордовия, Татарстан һәм Хакасия иҗат коллективларының үзенчәлекле һәм төрле спектакльләрен күрә алачак. Масштаблы фестивальдә 200дән артык кеше катнаша, алар арасында милли театр вәкилләре, мәдәният учреждениеләре җитәкчеләре, театр тәнкыйтьчеләре һәм сәнгать белгечләре дә була. 

Рәсми ачылу тантанасы 22 июньдә «Мастеровые» рус драма театрында узачак, анда шул ук кичне Горномарийск драма театры труппасы «Левша» трагифарсын тәкъдим итәчәк. Фестиваль кысаларында барлыгы 30дан артык чара планлаштырылган, алар арасында спектакльләр күрсәтү, шулай ук бай профессиональ программа: милли мәдәният буенча мастер-класслар, менеджмент буенча тренинглар сериясе, белгечләр өчен секцияләр һәм түгәрәк өстәлләр, шулай ук театр тәнкыйтьчеләре белән спектакльләрне тикшерүләр.

Милли театрлар фестивале – Россия милли мәдәниятләренең күптөрлелегенә ярдәм итүне тормышка ашырырга, шулай ук илебездә яшәүче барлык милләтләрнең мәдәни традицияләрен саклап калуның мөһимлеген ассызыклый торган федераль әһәмияттәге проект. Фестиваль Россия халыкларының бетмәс-төкәнмәс байлыгына нигезләнгән милли мәдәни традицияләр белән танышырга мөмкинлек бирә. Фестивальнең оештыручысы – Россия Федерациясе Мәдәният министрлыгы һәм Татарстан Республикасы Мәдәният министрлыгы ярдәмендә «Столица» Мәскәүнең социаль һәм мәдәни үсешенә ярдәм фонды.