Гүзәл Уразова акчагыз күп диючеләргә: «Эшләргә кирәк, беркемгә дә китереп бирмиләр»

Татарстанның халык артисты Гүзәл Уразова җыр-биюдә генә түгел, аш-су өлкәсендә дә уңган. Үзизоляция вакытында әни кеше гаиләсен төрле тәм-томнар белән сыйлый. Шушы көннәрдә җырчы Инстаграм тасмасында яңа гына мичтән чыккан пирог тотып төшкән фото урнаштырды.

«Көне буе аш бүлмәсендә мәш киләбез.

Бүген бездә, балалар соравы буенча, пицца һәм алма пирогы.

Хәзер иртәгә нәрсә пешерергә дип, теләкләрен яудырып утыралар.

Вәт рәхәт чаклар!» — дип язган ул.

«Тапкансыз мактаныр нәрсә. Әйе, сезнең акчагыз күп бит, нәрсә телисез, шуны пешерә аласыз, ә башкалар исен иснәп утырсыннармы?» — дип канәгатьсезлек белдергән бер язылучы.

Гүзәл исә монда да югалып калмый, «Эшләргә кирәк, берсенә дә китереп бирмиләр», — дип җавап кайтара.

«Шарлотка пешерергә күп акча кирәкми. Теләк кенә кирәк», «Дөрес әйтәсез, күктән акча яуганны көтеп ятсаң, теләгән ризыгыңны ашый алмыйсың инде. Бу заманда ялкау булмаган кешегә эш табуы кыен түгел», — дип җырчыны яклап фикер язучылар да табыла.