Искәндәр Шакиров имиджын үзгәртә

«Сәхнә» журналы укучылары яшь артист Искәндәр Шакировның иҗаты белән якыннан таныш. Күптән түгел журналыбыз битләрендә җырчы егет белән кызыклы интервью да урын алды. Интервьюның тулы вариантын тиздән сезгә дә тәкъдим итәрбез.

Бүген исә, сүзебез бу хакта түгел. Белүебезчә, артист тормышында һәрвакыт көтелмәгән вакыйгалар һәм яңалыклар булып тора. Шушы тормыш темпыннан тайпылмас өчен артист кеше үзенең тышкы кыяфәте, икенче төрле әйтсәк, образы турында еш кайгыртырга тиеш. Шулай Искәндәр Шакиров та тамашачыларын яңа образы белән сөендерергә булган. «Челка»ңны ник кистердең дигән сорауга ул «Картаямдыр инде», – дип шаяртты. Ә тышкы кыяфәтендәге үзгәрешләр хакында Искәндәр болай дип сөйләде:

– Чәчеңне кистер, сиңа болай килешми дип әйтүчеләр күп булды, ләкин мин андый фикерләргә игътибар бирмәскә тырышам. Күңелемә хуш килгәнчә киенәм, иҗат итәм һәм чәчемне дә үзем теләнчә кистерәм. Бу очракта имиджны алыштыру карарына үзебез килдек, кеше киңәше буенча түгел. Ниндидер яңалык кертәсе килде. Шулай ук, алга таба тагын бер көтелмәгән үзгәреш булачак – чәчемне яңа төскә буятырга теләгем бар. Хәзерге вакытта шул хакта уйланам, кирәкме бу миңа, юкмы, әлегә белмим?..

Дуслар, ә сез бу хакта нәрсә уйлыйсыз? Үз фикерләрегезне Искәндәргә юллагыз. Җырчы егетнең яңа образын бергәләп уйлыйк!

Автор: Алсу Габдуллина

Фото: И.Шакиров