«Әлдермештән Әлмәндәр» премьерасы!

1 сәгать 8 минут дәвам итүче «Әлдермештән Әлмәндәр» фильмы  олылар аудиториясе өчен эшләнгән. Картина тормышка мәхәббәт, аның һәр мизгеленең кадерен белү, матур картлык һәм халык зирәклеге турында. Режиссеры – Сергей Киатров, сәнгать җитәкчесе – Марат Ганиев, композиторы – Мария Сергеева, сценаристлар – Азат Ганиев һәм Алсу Низамиева. Проектта 18 иллюстратор һәм 26 аниматор көче белән 90 персонаж, 650 фон, 1126 күренеш ясалган.

Күк канцеляриясендә гадәттән тыш хәл: рөхсәтсез озак яшәүче, ә атап әйткәндә, Әлдермеш авылында гомер итүче Әлмәндәр исемле карт табылган. Ул яшь килеш үләргә тиеш булган, ләкин могҗиза белән исән калган, һәм хәзер күк канцеляриясе җитәкчелеге Әҗәлдән кичекмәстән Әлмәндәрнең җанын алуын таләп итә. Әмма моны эшләү бик үк җиңел булмаячак, чөнки картның җаны күптән күктә булып санала, димәк, Әлмәндәр анда үз теләге белән генә бара ала. Әҗәл теге дөньяга ашыкмаган Әлмәндәр белән килешә алырмы? Әллә зирәк һәм тапкыр карт Әҗәлне алдармы?

«Әлдермештан Әлмәндәр» фильмы май ахырында узачак I Воронеж халыкара анимация фестиваленең конкурс программасына кабул ителгән. Шулай ук әлеге проектның Казан халыкара мөселман киносы кинофестивалендә катнашуы планлаштырыла. Фильмның республика кинотеатрларында прокаты фестиваль язмышы тәмамланганнан соң узачак. +12

Фото: Татармультфильм