Туган телләрне мәҗбүри өйрәнү турындагы петицияне биш меңнән артык кеше имзалаган

(Казан, 28 апрель, “Татар-информ”, Алия Җамалиева). Бүгенге көнгә Россия Федерациясе халыкларының туган телләрен гомуми белем бирүнең уку планында мәҗбүри өйрәнүне саклау турындагы петицияне биш меңнән артык кеше имзалаган.

“Россиянең туган телләренә каршы законга - юк” инициативалы төркеме Россия Федерациясе Президенты Владимир Путинга адреслап петиция язган. Россиядә яшәүче төрле милләт вәкилләрендә, Дәүләт Думасына “Россия Федерациясендә белем бирү турындагы” Федераль законга үзгәрешләр кертү турындагы закон проектын кертү белән бәйле канәгатьсезлек һәм гаделсезлек хисе уятты.

“Проект инициаторлары Россиянең күп милләтле гаиләсе өчен иң кадерле һәм изге туган телгә кизәнә. Бу депутатлар үз туган телләребезне мәҗбүри уку планы буенча өйрәнүдән тыю гадел дип уйлыйлар. Аның урынына безгә факультатив буларак өйрәнергә тәкъдим итәләр. Безне “мондый гарантияләр” канәгатьләндерми, чөнки теләсә кайсы аек акыллы кеше өчен 68нче маддәнең 2нче пунктында каралган конституцион гарантияләр үтәп булмаслык ителгәне аңлашыла”,- диелгән инициативалы төркем мөрәҗәгатендә.

Мөрәҗәгать авторлары Владимир Путин “ил өчен зыянлы бу закон проектын” карауны рөхсәт итмәячәк дип ышана. “Россия Федерациясе һәрвакыт күпмилләтле һәм тату гаилә булачак, анда бер генә халык та кимсетелмәячәк һәм дәүләт гарантиясе исәбенә тел өйрәнү хокукыннан азат ителмәячәк дип ышанабыз”,- диелгән документта.

татар-информ