Җәвит һәм Зөлфия Шакировлар гаиләсен котлыйбыз!

Кичә Зөлфия һәм Җәвит Шакировларның уллары Искәндәр Шакировның туган көне булган! Искәндәрнең туган көне уңаеннан әтисе инстаграмда пост урнаштырган.

«Хәр бала бу дөньяга үз бәхете белән туа. Инде бала Әни карынында чагында ук аңа бәхетле булуын, сәламәт булын телибез! Бу теләкләрне Әни белән Әти үзләре исән чагында көнгә мең тапкыр кабатлый торгандыр. Без дә шулай! Аларның тормышларының матур булуын, юлларында яхшы кешеләр очравын, эшләренең уң булуын телибез!

Улым Искәндәр! Без дә бүген Әниең белән шул теләктә! Без олыгайган көндә безгә терәк булып, бары тик шатлык кына китерсәң иде. Хыялларың тормышка ашсын. Сәламәт бул! Без сине яратабыз! Туган көннәрең алда күп булсын, безне шатландырып кына яшәуеңне телибез!» – дип яза артист

Моннан тыш, Җәвит Шакиров улларына багышлап шигырь язган:
Ике улым – ике бөртек
Ике лачын – ике бөркет.
Шунысы мөһим, яшәмиләр
Бу дөньяда куркып, өркеп.
Әйтер сүзен ярып әйтә,
Таш йөртми куенда.
Әти-әни тәрбиясе,
Начарлык юк уенда!
Безнең белән мактанмыйлар,
Ялганлап, акланмыйлар.
Кемгәдер ялагайланып,
Беркайчан вакланмыйлар!
Атай малыкатай диеп
Җилкәгә атланмыйлар!
Эшләп ашарга өйрәтә
Һәркем дә үз баласын.
Белеп үссен авыр чакта
Үзенә таянасын!
Җае чыккан саен әйтәм,
Эшләми кесә тулмый.
Вакыт үткәч, буын каткач,
Терсәкне тешләп булмый!
Бәхет, байлык – яңгыр тугел
Чиләкләп күктән төшми
Бәхетле булып булмый,
Җиде кат тирең түкми!
Ярый да бүген киңәшкә
Әтиең, Әниең бар!
Сезнең бит бездән соң калып,
Дөньяда яшисе бар!
Бәхет ул тырышсаң гына,
Чыга шул юлларыңа.
Бәхетләре булыр, Аллаһ бирсә,
Ышанам улларыма!»