Зәмирә Рәҗәпова: «Тамашачыны алдап булмый»

Зәмирә Рәҗәпова алып бара торган «Әй язмыш, язмыш» тапшыруы күпләрнең күңелен яулады, түземсезлек белән яңа чыгарылышларны көтәләр. Шуңа да Зәмирә үзе бу хакта сөйләп китте.

«Бу тапшыруга карата булган мәхәббәтегез, игътибарыгыз кайвакыт гаҗәпкә калдыра. Бу проектны башлаганда, мин аны шулай популяр булыр, дип уйламаган да идем. Тамашачы мәхәббәтенең сере нәрсәдә сон? Җавап бер ‒ ихласлылык!!! Монда бер кем дә тормышын сырлап, тәтиләп утырмый, ничек бар шулай сөйли. Әлбәттә, андыйлар да очраштыргалаштыра. Тик тамашачыны алдап булмый. Чөнки, ютубта да, телевидениеның рейтинг саннары буенча да, сездән килгән язмаларга караганда да, бөтен җанын, язмышын, күңел төпкелендәге серләрен ачып салган кунакларның тапшырулары иң яратып каралганы. Чөнки йөрәктән йөрәккә барып житә.

«Сүз башы бит Шүрәле...», дигәндәй, кайчан яңа сезон башлана? «ТНВ» җитәкчелеге фәрманы белән, сентябрь уртасыннан яңа язмышлар белән очрашулар көтә сезне. Студиябез дә яңарды, данлыклы Тукай музее залларының берсендә бара. Гаҗәеп матур, зәвыклы интерьер... Бар серне дә ачмыйм. Үзегез күрерсез әле, «ТНВ» каналында очрашканга кадәр».

Көтәбез.