Зәмирә Рәҗәпова: «Тукмак борынлы ир белән гомер буе яшәп булмый бит инде...»

Татар халкында төрле ырым-шырымнар күп. Шулар хакында алып баручы Зәмирә Рәҗәпова үзенең инстаграм социаль челтәрендә язган. Алар булачак иреңнең нинди булачагына бәйле.

«Без бәләкәй чакта Дәү әни әйтә иде:

- Тукмак (бәрәнге төйгеч) ялама, киявең тукмак борынлы була;

- Иләк аша карама, киявең шадра була;

- Көянтә чиләк белән су алып кайтканда, чиләгеңне болгама, суы түгелмәсен, киявең хәерче була;

- Мич якканда учагың беренче кабызуда янып китмәсә, киявең ялкау була;

- Керне яхшылап сыгып бетермәсәң, кайнанаң усал була;

- ...

Ни өчен гел кияү белән бәйле булгандыр ул. Югыйсә, бу кагыйдәләрне үтәмәсәң, үзең бестолковый килен буласың, дими иде.

Ну бу әбиләәәр, кияү белән куркытып әллә ниләр эшләтткәннәр...

Мин чын күңелдән бу «әби кагыйдәләрен» бозмаска тырыша идем. Тукмакта калган бәрәңгене ялыйм дип, тукмак борынлы ир белән гомер буе яшәп булмый бит инде. Ә учак якканда хәзер дә беренче кабызуда яндырып җибәрергә тырышам, ялкауланмасын, дим. Күрәсең, юкка тырышмаганмын....»