Театр тамашачысы мәктәбе «Моңлы бер җыр» спектаклен карарга чакыра

26 октябрь 18.00 сәгатьтә Камал театрының Кече сәхнәсендә «Камал мәктәбе» театр тамашачысы мәктәбенең 10нчы дәресе уза. Тамашачыларга «Моңлы бер җыр» спектакленең (1981 ел) видеоязмасы күрсәтелә. Авторы – Туфан Миңнуллин, режиссеры – Марсель Сәлимҗанов.

Спектакль хакында:

Җәлил һәм җәлилчеләр, аларнын көчле рухы, күрсәткән батырлыклары темасы татар театр сәхнәсендә яңалык түгел. Театр тарихы Н. Җихановның «Җәлил» операсын, Н.Исәнбәтнең «Муса Җәлил», Р.Ишморатовның «Үлмәс җыр» пьесалары буенча эшләнгән спектакльләрне белә. Советлар Союзы Герое, Ленин премиясе лауреаты Муса Җәлилнең тууына 75 ел тулуга багышлап, Камал театрында куелган «Моңлы бер җыр» алда әйтелгән спектакльләрдән кай яклары белән аерыла соң? Бу сорауга җавап бирү өчен, иң элек пьесаның язылу формасына игьтибар итәргә кирәк. Моңа кадәр бу темага язылган драма әсәрләре сәхнә бизәлешендә һәм уен манерасында тормыш дөреслеген саклау принцибыннан чыгып төзелгән, аларда вакыгайларның эзлекле агышы, хронологик принцип нык сакланган иде. Ә биредә әсәрне кору өчен нигез итеп шартлылык алына. Вакыйгалар үзәгендә – хәзерге заман шагыйре. Спектакльдә төрле вакытта, төрле урында булып узган хәлләр тамашачыга аның фикерләве, аның мөнәсәбәте аша җиткерелә.

kamalteatr.ru

Фото kamalteatr.ru сайтыннан алынды