Республикакүләм Чыршы бәйрәмендә Тукай әкиятләренә нигезләнгән тамаша күрсәтәләр

Бүген Казанның «Татнефть-Арена» боз сараенда күрсәтеләчәк республика күләмендәге Яңа ел бәйрәме тамаша программасы Габдулла Тукай әкиятләренә нигезләнеп төзелгән. Бу хакта Хөкүмәт Йортында узган брифингта Татарстан Республикасы Премьер-министры урынбасары Ләйлә Фазлыева хәбәр итте.

«Республикакүләм Чыршы бәйрәменә 8 меңләп уку алдынгысы, олимпиадаларда җиңүчеләр, Татарстанның балалар иҗтимагый оешмалары активистлары һәм әйдәп баручылары чакырылган. Тантаналы чарада 7 яшьтән 17 яшькәчә балалар катнаша. Аларга Габдулла Тукай әкиятләренә нигезләнеп төзелгән «Әкиятләрнең кайтуы» тамашасы күрсәтеләчәк», – диде ул.

Ләйлә Фазлыева әйтүенчә, тамашада меңгә якын артист һәм җырчы катнаша. Шулай ук популяр җырчы Юлианна Караулованың да чыгыш ясавы көтелә.

Чыганак: татар-информ