«Сәхнә» журналы Яшел Үзән районының «Әйшә гомуми урта белем бирү мәктәбе» укучылары белән очрашты

Биредә шулай ук музыка һәм сынлы сәнгать мәктәбе эшләп килә. Мәктәп бусагасын атлап керүгә безне диварда сәнгать мәктәбендә шөгыльләнүчеләрнең әниләр бәйрәменә багышлап иҗат ителгән эшләреннән торган күргәзмә каршы алды. Алга таба мәктәпнең актлар залында музыка мәктәбе укучылары һәм аларның укытучылары ярдәме белән әзерләнгән концерт программасы тәкъдим ителде.

Җыр-бию, җанлы музыка уен кораллары (Юлия Петрова җитәкчелегендәге скрипкачылар ансамбле, Борганова Татьяна җитәкчелегендә домбрачылар, баян) чыгышлары һәм туган телдә яңгыраган шигырьләр белән үрелеп барылган концерт залда утырган һәркемнең күңеленә хуш килде.

Без дә, үз чиратыбызда, бәйрәмгә буш кул килмәдек. Балаларны «Сәхнә» журналы эшчәнлеге белән таныштырдык, журналларыбызны бүләк иттек. Алга таба «Әйшә гомуми урта белем бирү мәктәбе» укучыларының иҗатын журналыбыз битләрендә дә күрербез дигән теләктә калабыз.