Вадим Захаров концертына ялган акча белән кергәннәр

Татарстанның атказанган артисты Вадим Захаров кызык та, кызганыч та хәлгә тарыган. Җырчының концертына берәү 200 сумлык ялган акча белән кергән. Бу хакта Вадим «Интертат» хәбәрчесенә үзе сөйләде.

- Яңа ел бәйрәмнәре арасында, 4-7 гыйнварда авылларда концертлар белән йөрдек. Шуннан җыелган 200 сумлык купюраларны кесәгә аерып салып куйдым да, бүген шуның 2000 сумына заправкага кереп, бензин салдым. Акча түләгәндә кассир кыз: «Сезнең бит бер акчагыз ялган!» ди. Әллә нишләп киттем. Карасам, чыннан да бер акчага «200 дублей» дип язылган, «Билет банка приколов» чыгарган. Ни көләргә белмәдем, ни еларга. 200 сумлык бу акчалар – тамашачыларның билет алган акчалары. Менә шуны уйлыйм: бу кеше ни йөзе белән концерт карап утырды икән дә, нинди күңеле белән шулай эшләде икән дим. Моның ахырын бу кассир белән икебез генә беләбез. Шуңа күрә әзрәк кенә мәгънәлерәк булыйк әле дип әйтәсе килә, - ди җырчы.

интертат